Bir yol durur qabaqda.
O da ki, baxır baxta.
Ömür sanki marafon,
Əvvəl varsa, vardır son.
Zaman daim uçuşda.
Vaxtı ud bu qaçışda.
Öz ürək həmdəminlə
Yürü qolboyun, qoşa,-
Ömrü mənalı yaşa!
~~~~~~~~~~~~~~~~~
Deyil ki, bir Çin səddi,-
Vardır hüdudu, həddi.
Əllidi, ya yüz ildi,
Ömür də dörd fəsildi.
Səməri qucaq-qucaq,
Payızı adlayaraq,
Alnıaçıq, üzüağ
Gəlib çıxasan qışa,-
Ömrü mənalı yaşa!
~~~~~~~~~~~~~~~
Saldı səni oyuna,-
Qal başının hayına.
Bu oyunu kim qurdu?-
Yaradan rejissordu,
Həyat əsil tamaşa...
Rolunu elə oyna
Layiq olsun alqışa,-
Ömrü mənalı yaşa!
~~~~~~~~~~~~~~~
Tale ilə sən daha
Bənzərsiz yaya, oxa.
Yayından çıxan oxsan.
“Öldü var, döndü yoxsa”-,
Qarşıda hədəf durur,
Yetirsə şərəf, qürur,
Toxunmaya, kaş, daşa,-
Ömrü mənalı yaşa!
~~~~~~~~~~~~~~~~~~
Bu tütündür nəfi nə,
Acıyıram səhvinə.
Tüstüsü burum-burum,
Ciyərin tamam qürum.
Kötüklər qalaq-qalaq
Közərir...Sönür ocaq.
Bir budaqsan təzətər
Söylə, görüm nə qədər
Zəqquma dönər axşam,
Zəhərə dönər səhər?!
Qıyma yana, alışa,-
Ömrü mənalı yaşa!
~~~~~~~~~~~~~~~~~
Güman yoxsa sabaha
Sığın tək bir Allaha.
Bir yanlışdan üzülmə,
Dodaq kimi büzülmə.
Üz vermə dərdə hədər,
Kədər gətirər qəhər.
Yeməsin səni kədər,
Nəşəsi var o qədər...
Halın pozulsa işdir,-
Onda özünü aldat,
Kədərinə sevinc qat.
Dişinlə, dırnağınla,
İşində olmağınla
Taleyini sən yarat!
Bir qanadı sevincdi,-
Həyat bənzəyir quşa.
Sabun köpüyü kimi
Boşa çıxmasın, boşa,-
Ömrü mənalı yaşa!
Ömrü mənalı yaşa!
İbad Əliyev
noyabr 2018
